اول يوم فى الوحدة الصحية و 9 نصائح لطبيب الاسنان المكلف حديثا
الانطباعات الاولى زي ما بيقولوا تدوم، لذلك اول يوم لك استلام عمل بالوحدة الصحيه كطبيب اسنان مهم جدا تكون فى صورة جيدة ومقبولة ، لان دى شخصيتك فى المهنة ومكان عملك وبتستمر معاك طول ماانت فى المكان ده .
.webp "اول يوم فى الوحدة الصحية و 9 نصائح لطبيب الاسنان المكلف حديثا")
النصيحة الاولى
بلاش تكون داخل مكان جديد وخاصة مكان عمل ، وتحولتتصاحب على كل الناس اللى فيه من الموظفين والاطباء والتمريض والعمال من اول يوم ، وانت لسه ماتعاملتش مع حد منهم ولاتعرفه قبل اليوم ده .
الفكرة ان مش هيتقال عليك الدكتور الجدع وصاحب صاحبه ومتواضع ،بالعكس ممكن يتبنى عنك عكس ده كله .
كمان بيوصل لهم انك جاى تبنى علاقات علشان تغيب براحتك وانك " مش بتاع شغل "
خليك طبيعى واتعامل عادى دون تكلف او تصنع منك .
النصيحة الثانية
تكلم مع كل موظف او زميل باللقب او المسمى الخاص به ، استاذ فلان او مس فلانة او حتى الزملاء دكتور فلان .
ده افضل لان مفيش اي سابق معرفة بينكم وبالتالى حفظ الالقاب افضل شئ للجميع لفرض الاحترام ، الى ان تعرف شخصية كل حد بتتعامل معاه مع الوقت ، بل والافضل الالتزام بالاحترام المتبادل بحفظ الالقاب الى اخر يوم تعمل فيه بالمكان .
النصيحة الثالثة
لاتنتقد عمل زملائك ، يعنى لنفرض انك كنت جالس بالعيادة ، واحد الزملاء يقوم بخلع ضرس لمريض والاجراء اخد وقت منه ، او حتى قام بخطأ طبي وانت لاحظته ، لاتنتقده امام الميض ويكون اسلوبك بعد خروج المريض به لين ولطف دون تجريح او اسعراض لمهاراتك وتفوقك واظهار فشل زميلك .
فجميعنا معرضون لهذا الموقف .ويحصل لنا استياء من الشخص الذى يتنقدنا نقدا غير موضوعى للانتصار لشخصى واظهار التفوق وفقط .
النصيحة الرابعة
حاول اذا تم دعوتك الى فطار او شاى بمكتب احد الموظفين او من خلال التمريض او حتى الزملاء ، لاتقبل من اول يوم ، اعتبرها عزومة ، مش قبولك للدعوة هو اللى هيقول انا شخص متواضع وطيب ، ولا عدم قبولك يقول انك شخص متكبر .
ارفض بلطف وادب واتحجج بأى حجة ، انا متعود افطر فى البيت مثلا .
خليها قاعدة ثابتة فى حياتك بلاش فطار فى الشغل .
النصيحة الخامسة
لو الوحدة الصحية البنية الاساسية والمبنى الخاص بها غير ملائم لتقديم الخدمة الصحية ، بلاش تنتقد ده امام الزملاء والموظفين فى اول يوم لك فى الوحدة .
النصيحة السادسة
فى الوحدة الصحية ونظرا للاعداد الكبيرة لاطباء الاسنان ، فنظام تقسيم العمل متعارف عليه وشبه مقبول .
لكن لاتفرض شروطك وظروفك على الزملاء الاقدم من اليوم الاول لك ، تكلم مع اقدم طبيب واللى هتلاقيه فى الاغلب مسئول عن الجدول ، واعرض وشوف ايه الايام اللى تم تحديدها لك ، وبعد ذلك لو عندك ظرف قهرى ممكن تتناقش معاه فى تبديل الايام .
النصيحة السابعة
التزم بالتواجد بعيادتك ، حتى لو اغلب الزملاء متعودين يجلسوا بالصيدلية ، التزم بمكان شغلك فى البداية .
بلاش تجلس مع الكاتب او اى موظف بالوحدة فى مكتبه وانت لا تعرفه ولايوجد سابق معرفة .
النصيحة الثامنة
انتبه لحماس البدايات ، وانك دخل العيادة وتقول محش هيشتغل هنا غيرى ، وعنك يادكتور ، انا اللى هشيل اليوم ده .
او تجيب معاك ادواتك والكونترا والروتارى والابيكس ، من اول يوم ، وتقول انا عاوز شغل ، والتغيير للمكان ده هيكون على يدى .
حتى لو بتحب الشغل متخوفش زملاءك منك ، لو هم شغالين هيقلقوا تاكل الجو منهم ، ولو هم مش بتوع شغل هيقلقوا اكتر لانك هتبين انهم ناس مش بتوع شغل .
بلاش تقلقهم منك فى البداية علشان مياخدوش حذرهم اويحبطوك او يدوروا على طريقه يكرهوك بها فى المكان والشغل .
النصيحة التاسعة
مرتبطة شوية بالنصيحة السابقة وهى انك ، متدخلش على الزملاء بدور المفتش الناقد للواقع والباحث عن الحقيقة ، وعاوز اعرف ايه اللى فى دولاب الادوات عندكم ، وايه اللى فى الادراج ، وانا عاوز اعرف عندنا ادوات الممرضة شايلاها خارج العيادة ، وليه مش بتصلحوا اليونت وسايبينها عطلانه كده !! .
الخلاصة
اهتم بشغلك قبل كل شئ ، والتزم بقيمة العمل ، واعرف ان المريض اللى جاى الوحدة الصحية هو بحاجة للعلاج والخدمة اللى انت بتقدمها له .
اخلاقك وشغلك هما اللى بيظهروا معدنك الطيب وبيعملوا القبول عند الناس
