يوم طبيب الاسنان فى رمضان و7 نصائح لرمضان مختلف عن كل سنة
كل عام وحضراتكم جميعا بخير بمناسبة حلول شهر رمضان المبارك ، اعاده الله علينا جميعا بالخير واليمن والبركات .
فى المقال توضيح لتساؤل الكثير من اطباء الاسنان قبل رمضان كل عام عن نظام العمل فى العيادة قبل ولابعد الفطار ونصائح لجعله رمضان مختلف عن كل عام .
وقتنا فى رمضان منقسم ، لان بيتخلل اليوم فترة صيام كبيرة ، وفترة فطار وكمان نوم وخلالهم عمل .
الفيديو👇 على قناة ادارى اسنان
اولا مبدأ العمل بالعيادة الخاصة قبل الفطار 🌞
مبدأ العمل بالعيادة واستقبال الحالات وقت الصيام ، هيكون صعب عليك كطبيب وعلى اغلب المرضى وبخاصة اصحاب متلازمة المريض الصائم " البنج بيفطر والخلع بيدوخ والحشو بيهبط 😂"
وبالنسبة للطبيب لو انت عندك شغل صباحا بالصحة وبعدها هترجع على العيادة مباشرة ،فأكيد تركيزك وطاقتك هيقل اثناء الصيام ، واستقبالك للحالات الجديدة هيكون صعب.
لو مضطر يبقى استقبل الحالات المتابعة فقط اللى مش هتحتاج خطة علاجية او تفكير واجهاد ذهنى كبير مجرد عمل روتينى متكرر شبه اوتوماتيكى .
ثانيا مبدأ العمل بالعيادة الخاصة بعد الفطار 🌙
الوقت بعد الفطار فى رمضان افضل بالطبع للطبيب والمريض فى التركيز والراحة الذهنية وقلة التوتر بخاصة مع جو عيادة الاسنان المسبب للتوتر الدائم للمريض ، والضيق للطبيب .
لكن تكمن المعضلة فى كون الذهاب للعيادة بعد صلاة العشاء مباشرة ام بعد العشاء والتراويح ( صلاة القيام ) ؟؟!
شهر رمضان المبارك شهر لايأتى الا مرة واحدة بالعام وبه نفحات لاتعوض ، والافضل ان نتعرض لتلك النفحات ، فالبركة فى صلاة القيام ولو جزء يسير منها ، ومن الممكن ترك ركعتى الشفع وركعة الوتر لما بعد العودة من العيادة منتصف الليل قبل السحور .
وعود المترددين على العيادة بميعادة تواجدك بعد صلاة التراويح ، ولاحرج فى ذلك ، لاغلب الناس يفضل السهر بليل رمضان ، وهو اياما معدودات فالاولى الا نتركها .
ماذا عن وقت الصبح اذا اعتمدنا مبدأ العمل ليلا بعد الفطار والتراويح
وقت الصبح ولحد اذان الظهر ، بيكون التركيز عالى ومستوى السكر فى الدم معقول بحيث اننا نقدر نقوم بأعمال ذهنية تحتاج لتركيز عالى ، وبيكون عندك خيارات عديدة
الايام اللى هتروح فيها شغل الحكومة
اعتبر وقتك فى الشغل ، حسب تقسيم ايامك مع الزملاء ، وقت شبه مقدس ، بمعنى انك عامل حسابك انك لازم تروح العمل لان اكيد هيجى لك مريض فى الشغل الصبح لم ينم طول الليل من شدة الالم وماشي بالمسكنات ومستنى الوحدة او المستشفى الصبح .
الايام اللى هتكون فيها راحة من العمل
هتلاقى افكار كتير تشغل بيها وقتك الصبح فى حاجة مفيدة ، نذكر منها على سبيل المثال :
- قراءة القرأن الكريم وحفظ بعض مما تيسر.
- مذاكرة مواد علمية لو حضرتك مسجل ماجستير او زمالة مثلا .
- متابعة محتوى مفيد او قيم على اليوتيوب او مراجعة كورسات فى اي مجال يهمك .
- قضاء بعض المشاوير الحكومية المتأخرة زى مشوار ترخيص العيادة او المرور او النقابة وغيره علشان لايتم تراكم الامور عليك بسبب التسويف .
- قراءة كتاب مفيد فى مجال احبه .
- ساعد اهل بيتك وببخاصة يوم الجمعه فى عمل ترتيب للمنزل .
نقطتين تحلى عنهم فى شهر رمضان الكريم
- متابعة السوشيال ميديا مثل الفيسبوك وتويتر وغيره لان المتابعة مضيعة للوقت الغالى اللى لايتم تعويضه الى العام القادم ، ولو محتاج تفصل ممكن تلعب مع اطفالك مثلا .
- ابتعد عن متابعة المسلسلات على التليفزيون والتليفون واكيد برامج المقالب .
خد قرار فى التخلى عنهم وشوف كم الوقت والبركة فى الوقت والطاقة والتركيز وراحة البال اللى هيتوفروا معاك تستغلهم فيما هو اقيم وانفع .
7 نصائح علشان رمضان السنة دى يكون مختلف
- قبل حلول اول ايام الشهر ، املأ بيتك بزينة رمضان ، ادخل البهجة والسرور على اطفالك اجعله شهر خير وبركة وبهجه على اسرتك ، خليه مهرجان .
- ساعد زوجتك قبل الفطار بتحضيرمائدة الطعام وخلى اطفالك يشاركوا ، وكل افراد الاسرة يجتمعوا معا .
- مفيش مانع تتصوروا كأسرة لوحدكم ، ولو معزومين عند اقربائكم او عازمينهم اتصوروا معاهم كذكريات جميلة تفتكروها بعدين .
- اعزم قرايبك على الفطار ومتخفش من غلاء الاسعار ، البركة هتحل على بيتك .
- لو ساكن قريب من طريق سفر ، او موقف سيارات اجرة او محطة قطار، قم بأخذ كمية من البلح الرمضانى ، ووزعه على المسافرين قبل الفطار بنصف ساعة .
- فى وقت الفراغ فى الاجازات ووقت الصيام لو متواجد بالبيت ، ابعد عن الموبايل 📱، والعب مع اطفالك افضل واقضي وقت ظريف معاهم بتعلمهم شئ مفيد .
- اعمل Time blocking ، قطع وقتك خلال اليوم بلوكات ( Blocks) علشان تكون عامل ادارة جيدة للوقت علشان لايتم هدره ويضيع والشهر يجرى منك ومفيش اي استفادة ن وبرشح لك فيدو من قناة دروس اونلاين بيشرح الطريقة دى كويس هتلاقى الرابط 👈هنا👉
اتمنى يكون المقال فى الفايدة لحضراتكم وفى انتظار تعليقاتكم على صفحة الفيسبوك والتليجرام واليوتيوب طبعا .
